ភ្នំពេញ៖ ខណៈមមាញឹកក្នុងនាមជាប្រធានអាស៊ាន នាយករដ្ឋមន្ត្រីកម្ពុជា នាព្រឹកថ្ងៃទី១០ ខែវិច្ឆិកា ឆ្នាំ២០២២ សម្តេចតេជោ ហ៊ុន សែន បានឆ្លៀតសរសេរសាររំលឹកដល់វិញ្ញាណក្ខន្ធកូន ហ៊ុន កំសត់ ដែលបានទទួលមរណៈភាពអស់រយៈពេល ៤៦ឆ្នាំក្នុងរបបសម័យ ប៉ុល ពត។
សម្តេចបានសរសេររៀបរាប់ទាំងក្តីនឹករលឹកកូនថាទោះបីជាសម្តេចរវល់ការងារប្រទេសជាតិយ៉ាងណាក៏ដោយក៏សម្តេចមិនភ្លេចដល់កូនដែរ។
សម្តេចបានបន្តរៀបរាប់ថា៖ «រយៈពេល ៤៦ឆ្នាំជារយៈពេលដ៏វែងតែពុកនិងម៉ែមិនដែលភ្លេចនូវរឿងឈឺចាប់ដែលបានកើតឡើងសម្រាប់រូបកូនព្រមទាំងពុក និងម៉ែនាពេលនោះដែរ។ ទឹកភ្នែករាប់លានដំណក់របស់ពុកដែលហូរធ្លាក់មកវាតែងតែដាស់តឿនពុកឲ្យបន្តការខិតខំលុបបំបាត់ចោលនយោបាយជ្រុលនិយមគ្រប់ប្រភេទនិងពីគ្រប់ប្រភពឲ្យអស់ពីកម្ពុជា»។
សម្តេចតេជោ បានអំពាវនាវសូមកុំឲ្យមានរឿងអកុសលរបៀបនេះកើតឡើងចំពោះប្រជាជនកម្ពុជាសារជាថ្មីម្តងទៀត៕
